Ikojar Na Ikojar

Na isuratkon : Basuki, S.Pd

Idia adong gulo, i si adong porkis. Idia adong rimbo i si adong handis. Idia adong hauma, i si adong musuna. Idia adong tua i si adong mara. Tarsoni ma pandok ni na parjolo mandok hata.

Hita na isorangkon pe tu ginjang ni banua on, leng na marlaon-loanan doi. Muda adong na pekok, adong na tigor, adong na pendek adong na gincat, adong na menek adong godang, adong na jeges adong na tongam.

“Iba... sai tama tong. Taru na umak ni si Rondang ma na angkup ilala i roha i na jolo. Ala le na mangolu!” ning si Bandit ma makkolos tu si Lobe.

“O le, Bandit. Inda mangan dabo harani hagantengan! Harani usaho olo. Ning rohakku, harani hagantenganmi ma so songonon nasibmu!” ning si Lobe ma paingotkon si Bandit.

“Amuse do harani i, Lobe?” longang si Bandit pabege-bege hobar ni si Lobe.

“Bo... Sattak ma ilala ho gantengna. Sombong ho di hatamaan. Ibaen Tuhan ho mar adaboru na jorbut.” Ning si Lobe mada marsitorang.

“Bo. Langa sala dei au na ganteng i?” mulak ia marsapa tu si Lobe.

“Inda. Ibaen Tuhan tai pe ho marjodoh dohot umak ni si Rondang. Na giot manguji kasobaranmu dei dabo dongan. Ulang ho sala sangka tu Tuhan tai, Bandit!” ning si Lobe ma maradopkon tu si Bandit.

Kecet puna kecet. Sampe ma halai tu hauma ni si Bandit.

“Ondeeee... Inang...! Ma sidung kita! Aha doma labo ni on!” Tarsonggot si Bandit mangaligi jaung nia ma juga jage ibaen musu i. Laos madabu ma pakkur na i hadang nia di abara.

Hapengan. Isapaninggal ni halai potangin, madung marhorja ma musu nai i hauma ni si Bandit i. Mulai sian kerek, buroon, dohot koka. Madung manjuga jageon suan-suanan ni si Bandit na tuari.

“Na bile mattong nasib on boto. Ma mattak ma iba manakko. Hapengan hona takkoi. Ma mattak ma iba manjuga jageon huta, sannari au muse doma na hona juga jage! Sondia doma au on, Lobe?” ning si Bandit ma hampir tangis. Rara muko songon palak na giot hombang.

“Bia muse ma ho hubaen, Bandit. Pabahat sobar. Bisa dope hita suani mulak i, Bandit!” ninna ma si Lobe manyobari si Bandit.

“Anggo pasuo bak do hot au. Hutappul, kucincang, muda porlu hu sengso sanga u balender. So iboto halai sanga sondia haccit na hona juga jageon.” Panas si Bandit.

“Bo. Ittong nga na sobar bibe. Na ibilis doma ubege i,”

“Ibilis pe jadi. Sedangkan ibilis pe anggo tarida, hugotap talonan nai. So iboto halai naso martalonan.” Ning si Bandit murpanas.

“Aha muse do dongan sala ni ibilis i. Mangucap ho dongan. Ulang sanga bakkit naron nyaemu.” Ning si Lobe paingot si Bandit.

“Hupaitte hamu ison. Andigan ro. Urabi taba, songon na mancincang hayu losa. Anggo porlu ubaen jadi losung. So iboto hamu na iduda inang ni si Rondang!” ning si Bandit baen panasna.

“Inda di au ho be boto. Mabiar doma iba paida-ida na. Onpe. Kehe ma au. Antap na madung i haskon musu nai ma emekki.” Ninna ma hobar ni si Lobe maradopkon si Bandit. Tai baen panasna ilala si Bandit, inda be ialusi ia be hata ni si Lobe.

I tonga dalan, bahat ma na tubu rusak ni roha ni si Lobe. Dukke baya ma abis eme nia di juga jageon musu nai. Sanga na so giot do halai manjama eme nia i. Mocom ma, inda tarpajojor be boto koum.

Tar dua lima pulu kolak nai so sampe tu hauma i, tarpaida na ma attara jolma sanga musu nai. Ana lobi godang.

“Aha do i baya luai. Takko musu nai doi!” ning ia ma songon na marsapa-sapa i bagasan roha. Ise dopettong dongan nia mangecet anggo inda leng dohot ia ia mangeceti.

Pas mei. Hapengan boto, bodat na godang do. Ma ijuga jageon bodat na godang i ma eme nia i. Munduk-unduk ma ia marsimonjap. Tiop kian golukna na madung ilayanna tajom. Baen tajomna, hum ioumbus pe obuk tu mata ni goluk i; gotap.

Tar lima kolak nai so sampe si Lobe tu hajugukan ni bodat na godang i. Si Lobe pe, taru na manganjak ma satolap ni gogo mangalancimkon goluk i tu bodat na godang i. Rupa-rupa, bodat i pe madung biasa do maradopan dohot jolma. Angan-angan ni si Lobe manyonggoti bodat na godang i. Rupa marbalik do poin.

Grrrreeerrrereekkkkk...!!!

Manyogar ilala bodat i mangadop si Lobe.

Si lobe na madung mabiar tu bodat na godang i pe langsung manyikur imbulu ni takkuhuk nia paida-ida papangan ni bodat i, ngangang—takkas doma ipon ni sude tarida dohot hola-hola i.

“Ampun ma au... Toloooooong!”

Mandipur doma si Lobe paida-ida bodat na godang i. Rupana, bodat i pe inda tarimo ia i haroro ni si Lobe i. Bo ikojarna mada si Lobe. Bo... si Lobe pe. Icicing ia na marlojong; puntang-panting: sampe lobe pe pisik.

Lau sampe ma ia tu hauma ni si Bandit. Ia pe taru na hampir bakkit ma sosak napas na. Batas inda adong adian na ia na marlojong i.

“O... Bandit... ulang ko i bandar i be. Kehe mita mulak. Harom mita on bo. Ligi jolo indun bodat na godang an. Keta.. keta...!”

“Au pe, inda diau ioppa bodat. Gumenan dope au ioppa inang ni si Rondang. Keta boooooo!!!”

Ning halai na dua rap marlojong. Kadang baya targoppang doma baen biarna.

Bersambung....