I Lopo Kopi

Naisuratkon Ni 

Basuki, S.Pd

Tarkatuok koooook...!!!

Martakuok ma manuk di habincaran ni mataniari i manyogot ni ari i. Si Bandit dohot si Lobe madung markobas ma giot kehe tu lopo kopi. Markombur–marbukkak sanga pe makkatai alias makkeceti. Leng balut dope imbako gaer, lengkap dohot pusukna di abit i.

“Kopi jolo parlopo. Dua!” ning si Bandit ma maradopkon si Pangga. Goar lengkapna si Panggaor. Ning halai, baen na parlopo i. Karejona hum na manggaor ma. Manggaor kopi, manggaor tes manis, manggaor kopi paet. Manggaor sanga aha ma na targaor.

“Inda diau marutang da, Bandit!” ning si Pangga ma maradopkon si Bandit.

“Patenang mada. Baen do kue kacang dohot goreng pisang nai da, Pangga!”

Inda pola sadia honok. Dua makkuk kopi manis ihut dohot gorengna madung taratak ma di jolo ni halai na dua.

Teng… eteng… eteng… eteng...!!!

Ninna ma sora ni cendok dohot makkuk kaco na marlago di bagasan makkuk ni halai na dua.

“Bia do, Lobe! Hu bege-bege. Mangarata doma eme namuyu i jogina!” ning Jatigor ma pamuloi kombur i. Jatigor on, Kapala desa ni halai ma on.

“Ah.. Biasa doda, Katua. Isuan eme--tubu eme. I suan si Bandit jaung--tubu jaung. Isuan katua i utte--tong do tubu utte. Inda sikkam na tubu i, Katua.” ning si Lobe mada mangalusi Jatigor.

“Olo ba… Isuan dokki--tubu bada. Isuan lasiak--tubu do manyiak.” ning si Bandit manimpoi hobar ni si Lobe.

“Aha do na manyiak-nyiak i, Bandit?” ning si Pangga mandohot-dohot i kombur lotok i.

“Aha muse mai. Dung tong dilasiaki, manyiak-nyiaki tong.” ning si Bandit mangalusi si Pangga.

“Ho he Bandit, na tubat-tubat lasiak doho sanga sondia?” ning Jatigor ma manyunduti kombur i.

“Bo au ba, inda na tubat-tubat lasiak au. Singgo adong na masa di huta on. Au pe na dohot ma au i di si.” ning si Bandit mangalusi Jatigor.

Memang da baya. Madung songon na jop ma roha ni halak huta Dolok Manuat i paida-ida si Bandit; madung songon na maruba ia dao. Na jolo ulang ma pira ni manuk. Manuk na mate pe ipangan ia do i. Salang manakko dibaenna. Apalagi ma mangan manuk na mate. Abis diparsaulion ia i.

“Sannari. Ulang be dongan tambai arsak ni halak huta on. Padenggan ma parangemu. Umur pe ma matobang. Ubanmu pe ma rondang. Iponmu pe ma bahat na lobang. Ulang be sai na giot  manamba porang.” ning Jatigor ma paingotkon si Bandit.

“Olo ba, Katua. Manambai oppu ni api tola dei kan, Katua?” ning si Bandit ma mangalusi poda ni Jatigor.

“Tambai ma Bandit. So iboto ho na hamosokan si sungut!” ning si Pangga ma manyorpoi kombur i.

“Hahahaha…” Rap martata halai di lopo kopi i. Si Bandit pe taro naso sodar ia sappak kopi na giot inumon i. Nauttung ma inda sompat mambursiki.

“Ke mita dongan tu dolokan. Bettak na ma arrayo ma buroon i i haumaan.” ning si Lobe ma paingotkon si Bandit na sosalose dope na martata i.

“Olo, bah. Ma jam sappulu hape,” ning si Bandit ma laos manyesep kopi na tading di makkuk nia i.

Tarsoni ma boto anggo dung markombur i lopo kopi. Inda sodar, hapengan ma gok na mago. Halak ma habang tu Bulan. Iba leng manukek dope i lopoan. Halak ma Pegawai, iba leng lale. Halak ma Hongkong tu Hongkong, iba leng kokong. Halak ma India tu Brazil. Iba leng ganjil.

O ale... na mangolu. Itadingkon dolok, na sangat gaul ma idok. Itadingkon lopo kopi, idok ma sitiur kiri. Tai jarupe songoni da koum. Timbang ma dongan hapadean dohot hasolaboan ni parange. Pinomatna ulang adong na potting tu. Ulang pottingan dolok timbang lopo. Ulang pottingan muse tong lopo timbang dolok.

Bersambung...