Si Lobe Dohot Si Bandit

Naisuratkon ni Basuki, S. Pd

I sada huta, ima i Dolok Manuat. Tinggalma si Bandit dohot si Lobe. Si Lobe, naiboto nia humin na tu masojid mia, dohot marmasyarakat. Na tangion ia ima si luluton dohot siriaon. Singgo adong ibege ia na maso di huta i, iusahoon ia doi ro patidaon bohi.

Marlain tong dohot si Bandit, singgo adong na hamagoan dohot na gaor di huta Dolok Manuat i. Totop doi si Bandit na dijalaki. Arian modom, borngin marusaho.

“O… Bandit! Tarsongon haluang doma uida ho boto sannari,” Ning si Jaingot maradopkon si Bandit.

“Anggo udak da. Tai inda na markapok au. Lagian pe, Inda na docit-docit pakkulingku,” ning si Bandit do mangalusi hatobangon i.

Idia adong bandit, di si adong lobe. Idia adong na targappit, di si adong na mangae. Tarsongoni ma nadirasoi ni halai di huta i boto koum.

I sada ari, kehe ma si Lobe manyuan eme. Haranattong halak parhutaon i leng na torus dope marhauma. Bia mattong halak dolok. Inda bisa marsaba–maol dapot aekna. Hum inumon pe maol do dapotna.

Muse... Eme hauma pe umuskus doi sian eme saba. Apalagi si Lumut Paon, si Gogo, si Perak, songoni juo si Bayak. Baen uskusna, pandok ni na pargabus i, sapala ma idahan eme hauma i, udak Jokowi pe lewat–maradian doi, pauap-uap dahanon hauma i. Ima so inda ra halak Dolok Manuat on marsaba.

Si Bandit pe mulai sodar. Na leleng mantong ia na mambaen gaor ihuta i. Madung maruba ma ia sian na hinan. Kehe ma ia tu Tor Manaon. Irabi taba ia ma boto koum harangan tombak i. Bope ning pamaretta inda tola mangaroppak harangan. Tong giot mangan–tontu tong marusaho.

Pandok ni omputta na jumolo sunduti; Gumenan dope mate harani isoro babiat, daripada mate isoro losok.

Baen si Lobe manyuan eme, si Bandit inda ra ia dohot-dohotan. Isuanna ma jaung. Sodar do da si Bandit, na ganjil-ganjil. Tai di haganjilan nia i, tong do maralasan.

“Usuan pe ho jaung. Semoga ho maroban uttung. Bisa dibolgang, bisa ditutung,” ning si Bandit ma laos manyameon jaungi tu lobong na madung iordangi nia i.

Ari logo pe madung na songon loja. Parudan ma ro gattina, ima na paborsak tano na horsang, harani dibabbab ari logo tolu bulan na lopus. Dung ro udan i boto koum, suan-suanan i pe, marjop ni roha. Eme ni si Lobe pe tubu na sangat ma jogina. Tarlobi muse tong jaung ni si Bandit; mangarata doma.

“Na jeges ma dongan eme mi, Lobe! Na idoamu dei?” Ning si Bandit ma maradopkon si Lobe.

“Marusaho do au baya, dung i usoraon tu Na Sada i. Ho pe uida, na sangat do boto jogina jaung mi, Bandit. Mangarata doma.” Ning si Lobe musettong maradopkon si Bandit.

“Boh. Harap doa nita sude madai. Leng holong dope roha ni Tuhan tai di hita.” ning si Bandit ma laos rap mulak ma halai huta.

I tonga dalan leng kombur lotok dope halai boto koum. Ulang taraso na mardalan i.

“Tele dongan. Aha do so manyuan eme ho?” ning si Bandit mada tu si Lobe.

“Boh. Tai leng na i ma aumkonon ari-ari on. Bo ho. Aso manyuan jaung dongan?”

“Isuan soni. Ja… adong mei tappang ni rasoki. Gumenan dope manyuan jaung daripada manyuan batu  i tonga dalan. Alale… Inang!” ning si Bandit mada laos tartundal. Inda diidana batu na ukkal di tonga dalan tu dolok i.

Baaaabbbb…!!! dobab ma si Bandit–tukkap.

“On mada na ubiarkon i. Inda mambaen tu hapadean. Inang ni pat do na marbosar.” laos jong-jong.

Paida-ida si Bandit na laos jong-jong songon na haccitan, igolom si Lobe ma tangan ni si Bandit laos manarikkonna anso rap jong-jong halai di jong-jonganna.

“Nada marimbar bibe. Rap hita baen ma usahona. Haru jaung pe, haru eme pe. Napenting, leng tarpangan. daripada batu. Inda tarilkil, ibondut pe. Laos na bolnang doma mata i!” ning si Bandit.

“Hahaha…” rap martata halai na dua songon naso adong arsak na. Dao i hauma an, madung marhorja ma buroon i mamulos suan-suanan ni halai.

Bersambung....